GOLPISMO INFORMATIVO E A DEMOCRACIA DA "ABEJA MAYA".

A Xunta  Electoral Central acaba de estimar un recurso de UPyD en que esta formación propoñía eliminar os 27 segundos diarios de cobertura de campaña electoral que lle asignara a CRTVG ao BNG, e así invisibilizar as mensaxes do BNG. Co silencio cómplice do PP e do PSOE.

Miguel e Ismael, de 21 e 18 anos, son só dous dos miles de mozos que saíron á rúa o día 22 de marzo para participar nas Marchas pola Dignidade e que ocuparon o centro de Madrid durante aquel día. Pero son as únicas persoas que aínda permanecen en prisión dous meses logo daquela manifestación. O primeiro deles foi detido o mesmo día 22 na parte final da protesta, tras producirse unha serie de enfrontamentos entre policía e manifestantes. Pola súa banda, Ismael foi detido a mañá do 4 de abril no marco da denominada Operación Puma 70, que tivo como consecuencia a detención de 11 persoas e a imputación doutras 9.

A Axencia Tributaria de Catalunya (AEAT) confirma, no último informe que presentou ante o Xulgado de Instrución número 3 de Palma, que foi Iñaki Urdangarin quen actuou "con engano" ante Facenda para defraudar ata un total de 337.138 euros nas cotas do IRPF correspondentes aos anos 2007 e 2008.

O candidato do PP ás europeas, Miguel Arias Cañete, e a súa familia utilizaron polo menos cinco empresas panameñas para facer negocios desde o paraíso fiscal caribeño desde os anos noventa. Cañete estivo directamente ligado á xestión de dúas desas sociedades: Lucite Development Inc e Angelmo International Corporation. E aparece relacionado coas outras tres a través de Havorad BV, firma que é a principal accionista das petroleras nas que é socio o exministro. Cañete dixo que explicaría isto despois do 25 de maio.(Infolibre)

A xuíza instrutora da operación Pokémon, Pilar de Lara, formou unha peza separada sobre a portavoz do PPdeG, Paula Prado:«se infiere la participación» da exconcelleira compostelán en «el pago de una factura inflada» pola representación do espectáculo La Abeja Maya, para beneficiar ao empresario Jesús Fuentes Maceira, implicado tamén en «adjudicaciones presuntamente ilícitas» a favor de GRS e Aquagest. O auto alude, así mesmo, a «influencias» nas que interviría Prado co entón tamén concelleiro Albino Vázquez e Adrián Varela, tamén compañeiro seu no Consistorio, para «beneficiar económicamente a su cónyuge en su actividad de venta de materiales textiles», entre eles aos Concellos de Santiago e Boqueixón,«empleando para ello a terceros intermediarios para no involucrar su nombre como proveedor». En terceiro lugar, o auto refírese á «influencia» da portavoz do PPdeG na contratación de determinadas persoas «afiliadas o próximas ideológicamente» ao seu partido «en empresas concesionarias de obras y servicios del Ayuntamiento de Santiago, «llegando a adaptar para ello los currículos a los puestos de trabajo».